Дали брашното се расипува и дали е безбедно да се користи брашно со поминат рок на траење? За да дознаат, новинарите на порталот Martha Stewart побараа совет од експерти за мелење брашно, безбедност на храна и наука за храна.
Што значи датумот на пакувањето?
Брашното од мелницата обично пристигнува на полиците во продавниците со отпечатен датум „најдобро до“, кој обично важи околу една година. Важно е да се разликуваат етикетите „најдобро до“ и датумите на истекување.
„Производителите ги наведуваат датумите ‘да се користи до’ и ‘најдобро до’ за да им укажат на потрошувачите на оптималното време за вкусот и својствата на брашното; ова не се рокови кои се однесуваат на здравјето“, вели Холи Марковиц, директор во компанијата King Arthur Baking Company.
„Датумите ‘продажба до’ се наменети за трговците на мало како индикација кога производот треба да се најде на полиците“, напоменува тој. На кесите со брашно најчесто ќе ја најдете ознаката „најдобро до“, а не вистински рок на траење. Тој датум, всушност, е показател за свежината, а не упатство храната да се фрли бидејќи станала опасна.
Начинот на складирање е клучен
Експертите се согласуваат дека, без оглед на датумот на пакувањето, вистинскиот рок на траење на брашното најмногу зависи од условите во кои се чува. Иако брашното е намирница која може долго да се чува на собна температура, начинот и местото на складирање влијаат на неговиот квалитет.
„Ознаките за ‘најдобро до’ се само груби насоки, а условите за складирање се она што ја прави големата разлика“, вели авторот на готварски книги, Харолд Мекги. „Брашното кое го држите цврсто затворено во фрижидер или замрзнувач ќе го задржи својот квалитет многу подолго од она во полупразна тегла на сончев кујнски пулт“, објаснува тој. Кога производителите го одредуваат рокот на траење, претпоставуваат дека брашното правилно ќе го складирате. „Тоа значи дека не е на премногу влажно или премногу суво место и најверојатно е некаде во мрак“, вели поранешниот здравствен инспектор Геворк Казанчјан.
Како да препознаете дека брашното е расипано?
Брашното со текот на времето може да ужегне. Харолд Мекги објаснува што значи тоа: „Тоа е бајат, непријатен вкус кој е резултат на разградување на молекулите на мастите и маслата на ситни, ароматични фрагменти. Ова разградување го поттикнуваат кислородот, светлината и топлината, а ужегнувањето се јавува кога природните масти во брашното оксидираат, слично како што може да се расипе маслиновото масло“. Ако почувствувате непријатен мирис, време е за нова кеса брашно.
Казанчјан го опишува мирисот на ужегнато брашно како „кисел, чуден, како во штала, а понекогаш потсетува на растворувач, хемикалија или боја“. Поради тоа, мирисот на брашното е добар начин да го проверите квалитетот, а ако не сте сигурни, подобро е да го фрлите.
Извор: odrzime.rs
